توماس نیکلاسون با وزیرخارجۀ تاجیکستان دربارۀ وضعیت افغانستان گفت‌وگو کرد

خبرگزاری راسک: توماس نیکلاسون، نمایندۀ ویژه اتحادیه اروپا در امور افغانستان با سراج‌الدین مهرالدین، وزیر امور خارجۀ تاجیکستان دیدار و در باره وضعیت افغانستان گفت‌وگو کرده است. وزارت خارجۀ تاجیکستان در خبرنامه‌ای گفته است که دو طرف گفت‌وگوی سازنده‌ای در مورد مسائل مربوط به وضعیت افغانستان و همچنین همکاری برای مقابله با چالش‌ها و تهدیدهای امنیتی و سیاسی داشته‌اند.
به نقل از خبرنامه، هر دو طرف همچنین در مورد وضعیت کنونی و چشم‌انداز توسعۀ روابط جمهوری تاجیکستان و اتحادیه اروپا در زمینه‌های مختلف تبادل نظر کردند. اتحادیه اروپا و آسیای مرکزی بر تشکیل دولت فراگیر و لغو محدودیت علیه زنان در افغانستان تأکید کردند.
تاجیکستان تنها کشور در آسیای مرکزی است که با تسلط دوباره طالبان بر افغانستان مخالفت کرد. این کشور بارها دربارۀ فعالیت گروه‌های تروریستی در شمال افغانستان و تجارت مواد مخدر ابراز نگرانی کرده است. گفتنی است که طالبان در کنار میزبانی از ده‌ها گروه تروریستی همچنان از گروه تروریستی«انصار الله» تاجیکستان در افغانستان میزبانی می‌کند. این گروه در بیست سال دورۀ جمهوریت دوشادوش طالبان علیه حکومت افغانستان جنگید، پس از به قدرت رسیدن طالبان این گروه در استان بدخشان و تخار و در مناطق مرزی با تاجیکستان مستقر شدند و مصروف آموزش‌های نظامی هستند.
سال گذشته یک بار شماری از این نیروها جهت برهم زدن نظام و امنیت تاجیکستان وارد آن کشور شدند؛ ولی توسط نیروهای امینیی تاجیکستان کشته شدند. تاجیکستان طالبان را مسوول ناآرامی‌ها در کشورهای منطقه می‌دانند و بابت ادامه حکومت این گروه نگران است.